難度：1.5星(5星最高)
距離：7公里
時間：3小時(邊行邊影)
起點：大圍火車站
終點：安蔭或菠蘿壩
 |
| Garnin突然share唔到圖,我唯有cap圖啦... |
呢條路線難度唔算太高，前半段都係石屎路，後半段繞落谷底之後，路線會有少少唔清楚，唔好行錯，響呢個山谷迷路都幾煩下。
路線有兩大特色，一係會經過城門隧道行車天橋；二係最尾可以近距離接觸水壩仲要行好長好長樓梯上去。可以影相嘅位置好多，不過我去既時候天氣好差，所以影嘅相好普通，你哋加油影啲靚相。
由大圍火車站E/D出口出發，沿積運街上山，你首先會見到沙田茵餐廳。
沙田茵餐廳係沙田其中一間歷史最悠久嘅餐廳 ，亦都係以前好多粵語片嘅取景地點。有興趣可以睇下
http://pc633hk2047.pixnet.net/blog/post/158156537-沙田茵餐廳-shatin-inn
過左沙田茵餐廳就會去到大圍新村迴旋處，呢度要換下城門道繼續上。下城門道真係幾斜下，行到尾就係寶福山。有部份人可能留意到喇，你其實係可以用64K號小巴skip左呢段路佢。
經過寶福山之後繼續沿下城門道上，經過兩個180度大彎之後，就會黎到下城門水塘主壩。
岩喇，你依家可能會意識到，其實呢條路線落雨係絕對唔可以行，因為會通過峽谷既底部，只要一有山洪暴，或者城門水塘排洪，你就死硬架喇。
睇完主壩風景就可以繼續行，行到主壩另一面，轉左，入水務通道。呢一段都係石屎路，唔難行。行行下就會見到城門隧道個兩條行車天橋(我打到呢度既時候正正搭車經過緊條橋)。
WoW，其實我從來未試過咁近呢兩條橋。向橋上面經過之後，你就會見到一條向下好斜既斜路，岩架喇，行落去啦。然後你會遇到個U turn，最後黎到天橋正下面嘅一塊空地。
其實都幾嘈，條橋上面仲有喇叭，你有機會聽到廣播。
旁邊有條輸水管道。行呢度過去會有條樓梯，可以直上孖指徑，不過今日唔行呢度。
影完相之後就要過全程最恐怖嘅鐵橋......與其話係鐵橋，不如話係鐵網橋，因為條橋係可以直望到底......
好鬼高......
小弟怕高，我向上望咁極速行過左條橋就算。記得唔好行太快，因為條橋好震。
過左橋轉右，呢度嘅路有啲唔清晰，因為係響草叢入面行，不過唔駛擔心嘅，你只要右轉就應該會搵到條水務署維修通道。
行多十五分鐘左右，就會見到城門水塘主壩，恭喜你，本路線最大既挑戰黎喇，就係要登上城門水塘主壩。
高到呢......
首先你要搵到路上去主壩先，最安全嘅方法係過一過河，去到水壩最右邊，會有條小路上；或者你可以好似我咁爬鐵梯上，大概5～6米高，爬到腳仔軟。
成功上到主壩最底層之後，就可以開始行呢4百級樓梯。城門水塘主壩高275英呎，接近一百米高，呢一段樓梯完全可以令你質疑自己做咩要咁屎忽癢黎行山。
大概行十分鐘就會到主壩頂(加埋你頂唔順要休息嘅時間)，之後就會見到城門水塘喇～當然攰到死係唔會有興奮既感覺。
到頂轉左，沿城門水塘條大路行就會去到菠蘿壩小巴站，有82號小巴出川龍街。
不過架小巴成日都好多人排隊搭，我一般都會沿水塘邊嘅小徑落山。今次我就係沿城門村落安蔭離開。
中間會經過廢屋
仲有個廟仔
之後就會到安蔭
不過呢條唔係咩主要路線, 怕你地迷路就唔介紹喇~
交通資訊
64K小巴 富山 - 大圍站
82小巴 荃灣兆和街 - 城門水塘
Prism 6 Blogger:
Prism 6 Production Facebook:
作品銷售點:
Comments
Post a Comment